សេចក្តីប្រកាសព័ត៌មាន
សេចក្តីប្រកាសព័ត៌មាន
រាជធានីភ្នំពេញ ថ្ងៃទី ២៥ ខែមករា ២០២៤៖ កាលពីថ្ងៃពុធទី២៤ ខែមករា ឆ្នាំ២០២៤ សហរដ្ឋអាមរិកបានចូលរួមជាមួយបណ្តាថ្នាក់ដឹកនាំមកពីព្រះរាជាណាចក្រកម្ពុជា ស្ថានទូតចក្រភពអង់គ្លេស អូស្ត្រាលី ស្វ៊ីស សឹង្ហបុរី ក្រុមហ៊ុន Infraco Asia និងក្រុមហ៊ុន ខ្មែរ ខូល ឆេន ឯ.ក ដើម្បីអបអរសាទរការបើកសម្ពោធជាផ្លូវការនូវឃ្លាំងត្រជាក់ ដែលមានទំហំ ៦,០៤៦ម៉ែត្រគូប ស្ថិតនៅជាប់កំពង់ផែស្វ័យយ័តភ្នំពេញ។
វាជាឃ្លាំងត្រជាក់ដំបូងគេនៅកម្ពុជាដែលបានបង្កើតឡើង តាមរយៈការគាំទ្រមូលនិធិពី ទីភ្នាក់ងារសហរដ្ឋអាមេរិកសម្រាប់អភិវឌ្ឍន៍អន្តរជាតិ (USAID) ចំនួន ៩៩៩,៦០៤.០០ដុល្លារសហរដ្ឋអាមេរិក និងការវិនិយោគពីក្រុមហ៊ុន ខ្មែរខូលឆេន ចំនួន ១,០១៧,៦០៥.០០ដុល្លារសហរដ្ឋអាមេរិក។
ឃ្លាំងត្រជាក់នេះបានចាប់ផ្តើមដំណើរចាប់តាំងពីថ្ងៃទី១ ខែសីហា ឆ្នាំ ២០២៣ និងផ្តល់សេវាកម្មផ្នែកភូតគាមអនាម័យផងដែរ។ ជាងនេះទៅទៀតឃ្លាំងនេះឆ្លើយតបនឹងឧបសគ្គប្រព័ន្ធទីផ្សារចំពោះកាលានុវត្តភាពនៃការនាំចូល និងនាំចេញរបស់ក្រុមហ៊ុនសហគ្រាសខ្នាតធំ និងមធ្យមនានា ព្រមទាំងសហគមន៍អភិវឌ្ឍន៍កសិកម្មផងដែរដោយផ្តល់លទ្ធភាពដល់កសិករខ្នាតតូច និងធុរកិច្ចដែលស្ត្រី និងយុវជនជាម្ចាស់។
លោកស្រី Bridgette L. Walker ភារធារីសហរដ្ឋអាមរីកប្រចាំប្រទេសកម្ពុជាបានមានប្រសាសន៏ថា "ការសហវិនិយោគរបស់ទីភ្នាក់ងារសហរដ្ឋអាមេរិកម្រាប់អភិវឌ្ឍន៍អន្តរជាតិ (USAID) ជាមួយ ក្រុមហ៊ុនខ្មែរ ខូល ឆេន ឯ.ក គឺជាការបោះជំហានឆ្ពោះទៅមុខមួយដ៏សំខាន់របស់កម្ពុជា។ ឃ្លាំងត្រជាក់នេះនឹងជរុញពាណិជ្ជកម្មក្នុងស្រុក និងក្នុងតំបន់ ទប់ស្កាត់នូវការខូចខាតនៃចំណីអាហារ ផ្តល់ផលប្រយោជន៍ផ្នែកសេដ្ឋកិច្ចចំពោះធុរកិច្ច និងអ្នកប្រើប្រាស់ផងដែរ។ ឃ្លាំងត្រជាក់នេះជាឃ្លាំងត្រជាក់ដំបូងនៅកម្ពុជាដែលនឹងបម្រើសេវាកម្មប្រកបដោយគុណតម្លៃដល់អតិថិជនទាំងផ្នែកនាំចេញ និងនាំចូល ថែមទាំងនឹងផ្តល់ផលប្រយោជន៍ ទាំងផ្ទាល់ និងប្រយោលដល់កសិករកម្ពុជា ព្រមទាំងអ្នកប្រើប្រាស់រាប់ពាន់នាក់ផងដែរ"។
ទីភ្នាក់ងារសហរដ្ឋអាមេរិកសម្រាប់អភិវឌ្ឍន៍អន្តរជាតិ (USAID) គាំទ្រមូលនិធិដល់ក្រុមហ៊ុន ខ្មែរ ខូល ឆេន ឯ.កតាមរយៈគម្រោងប្រព័ន្ធទីផ្សារ និងភាពជាដៃគូ ឬ Feed the Future Market Systems and Partnerships (MSP) Activity ដែលជាគម្រោងមួយក្នុងចំណោមគម្រោងជាច្រើនរបស់ USAID ក្នុងការអភិវឌ្ឍសមត្ថភាព ផ្នែកការទុកដាក់ត្រជាក់ និងភស្តុភារសម្រាប់ផលិតផលកសិកម្មនៅកម្ពុជា។
USAID Cambodia/Youra Soeum/2024