Me përdorimin gjithnjë e më të madh nga ana e tyre të internetit, Kosovarët, ashtu si edhe shumë përdorues tjerë kudo, po bëhen pre e lehtë e sulmeve kibernetike. Rreth 50 gra morën pjesë në një trajnim të mbështetur nga USAID-i në fshatin Biçec të Komunës së Kaçanikut për të mësuar mbi praktikat e përdorimit të sigurt të medieve sociale dhe mënyrat e mbrojtjes gjatë kohës së kaluar në internet.
TechOda, e zbatuar nga aktiviteti i USAID-it U Takon të Rinjve (Up to Youth), është një platformë e sesioneve informative që këshillon qytetarët lidhur me anët negative të internetit, si ngacmimi kibernetik, keqpërdorimi i të dhënave, lajmet e rreme, si dhe lidhur me aspektet pozitive të internetit, si qasja në informata dhe shkëmbimi i tyre për zhvillim të afarizmit, shfrytëzimi i mundësive për punësim, ose ndjekja e lajmeve më të reja në komunitetet e tyre.
Sipas Dataportal-it, platformës më të madhe për mbledhjen e të dhënave të internetit, deri në janar të vitit 2021, Kosova, një vend me rreth 1.9 milionë banorë, numëronte 1.76 milionë përdorues të internetit. Kjo shkallë e lartë e depërtimit të internetit në një vend ku shumica e popullsisë është nën moshën 30-vjeçare është një resurs i jashtëzakonshëm, por i cili gjithashtu bart me vete edhe rreziqe të konsiderueshme meqë një përqindje e madhe e përdoruesve kanë pak ose aspak informata lidhur ma atë se si të mbrohen nga kërcënimet kibernetike.
“Trajnimi dhe informimi më kanë ndihmuar të kuptoj se si të mos bëhem viktimë e sulmeve kibernetike,” thotë Turkijane Mezini nga Kaçaniku, njëra nga pjesëmarrëset. Për shumë nga pjesëmarrëset kjo është mundësia e parë për t’u ndërgjegjësuar mbi rreziqet që bartin me vete mediet sociale.
TechOda u organizua përmes nismës së udhëhequr nga të rinjtë e Rrjetit për Mbështetjen e Rinisë në Kaçanik, Han të Elezit dhe Viti për t’u ndihmuar grave dhe vajzave të reja të përdorin mediet sociale me vetëdije të shtuar dhe masa të përmirësuara të sigurisë.