Përkundër përpjekjeve nga ana e sektorit privat për t’i trajnuar punonjësit e ardhshëm përmes praktikave profesionale dhe qendrave private të trajnimit, numri i punëtorëve të kualifikuar në cilindo profesion të caktuar ende nuk është i mjaftueshëm për të përmbushur nevojat e tregut. Për të avancuar dialogun dhe bashkëpunimin në mes të sektorit publik dhe atij privat me qëllim të adresimit të këtyre sfidave, zyrtarë qeveritarë, pronarë biznesesh, institucione arsimore dhe donatorë u mblodhën në Samitin e parë të Arsimimit dhe Trajnimit Profesional (ATP) të Kosovës, të mbështetur nga USAID-i dhe të tjerë.
Klubi i Prodhuesve të Kosovës dhe Fondacioni Besa morrën mbi vete rolin prijës në organizimin e Samitit të ATP-së, ku morrën pjesë më shumë se 150 përfaqësues nga sektori publik dhe ai privat. Ndër të ftuarit në këtë ngjarje, të mbajtur në Parkun e Inovacionit dhe Trajnimit në Prizren, ishin Kryeministri i Kosovës, Ministrja e Arsimit, Shkencës, Teknologjisë dhe Inovacionit dhe Ministrja e Industrisë, Ndërmarrësisë dhe Tregtisë. Kryeministri Kurti dhe ministret shprehën gatishmërinë e tyre për të punuar së bashku me sektorin privat në përmirësimin e arsimit profesional në Kosovë. Ata pranuan ekzistimin e mospërputhjes në mes të kurrikulës dhe kualifikimeve të ofruara nga sistemi arsimor i Kosovës dhe nevojave të tregut vendor për fuqi punëtore të kualifikuar. Kryeministri Kurti theksoi se arsimi profesional dhe marrëdhëniet me sektorin privat janë prioritet për Qeverinë e Kosovës.
Matthew Cullinane i USAID-it foli në një panel diskutimi me pjestarë të diasporës, Ministren e Arsimit dhe të ngarkuarin me punë të ambasadës gjermane. Z. Cullinane foli për rëndësinë e kapërcimit të hendekut në mes të sektorit publik dhe atij privat dhe të paturit e një sistemi të përgjithshëm të koordinuar në Kosovë i cili siguron fuqi punëtore të përgatitur. Ai theksoi rolin e donatorëve në lehtësimin e kësaj marrëdhënie dhe mbështetjen e iniciativave të Kosovës. Realizimi i potencialit të plotë të fuqisë punëtore të ardhshme të Kosovës do të kërkojë udhëheqje nga sektori privat dhe përpjekje të koordinuara me qeverinë për të fuqizuar përfundimisht rritjen ekonomike.
USAIDKosovë